Satelite’s Blog

यी केही दिनहरुदेखी म लेख्न पाइरहेको छैन । ब्लगपनी अपडेट गर्न सकेको अवस्था छैन । एक हिसाबले ब्यस्त छु भन्दा हुन्छ । केही दिन पहिला सिन्धुपाल्चोकको थामी गाउँमा ‘प्रयोग भैसकेका लुगाहरु’ बितरण गर्ने सिलसिलामा पुगेका थियौँ । साथी कृष्ण र म त्यहाँ पुग्दा शनिबारको दिन हुनाले केटाकेटीहरु टन्नै थिय गाँउमा । हामीलाई घेरे । ती केटाकेटीहरु हाम्रा भविष्य हुन । तीनलाई जोगाउनु हाम्रो कर्तब्य हो ।

मान्छेहरुको आर्थिक, शैक्षिक र नैतीक अवस्था अती कमजोर रहेको थामी गाउँमा केटाकेटीहरु जाडोले कठ्याङ्ग्रीरहेको जानकारी पायपछी क्याप्टेन बिजय लामाको सहयोगमा तिस बोराजती लुगाहरु जम्मा गर्न सफल भयका थियौ हामी । केही लुगाहरु बुटवल र भैरहवाबाट पनि पठाइदिनुभयको थियो घरबाट ।

कसैका घरमा प्रयोग नभयर थन्कियका केही लुगाहरुले उनिहरुजस्तै अन्य कोही मनुष्यको जाडो कम गर्छ भने किन प्रयाश नगर्ने ? बुझ्दै जाँदा मानवताभन्दा ठुलो धर्म मैले भेट्न सकिन । तपाईं हामीले प्रयाश गर्दैमा केही मान्छेहरुमा खुशी बाँड्न सकिन्छ भने किन हामी प्रयाश नगर्ने ? हामी गर्छौँ ।

यसपालीको नयाँ बर्ष हाम्रो राम्रो बित्नेछ । म्याग्दीको शिख गाउँस्थित पुस्तकालयका लागि पुस्तकहरु जम्मा गरेर भोली साँझको नाइट चढेर हामी म्याग्दितिर लाग्दैछौँ । थुप्रै पुस्तकहरु जम्मा भयका छन् । कर्ण शाक्य, जगदिश घिमिरे, रबिन्द्र मिश्र , डा चिन्तामणी योगी लगायतकाले पुस्तक सहयोग गरेरमात्र हामी यति पुस्तकहरु जम्मा गर्न सफल भयका हौ । त्यसमा अष्ट्रेलियामा बस्ने नेपालिहरुका तर्फबाट सुनिल र प्रमोद अर्यालको सहयोग झन महत्वपुर्ण छ । यो नयाँ बर्ष हामी एउटा नयाँ पुस्तकालयको स्थापना गरेर त्यहिँका शिक्षक, विद्यार्थी, बाघबिर र त्यहाँस्थित गाँउलेहरुसँग मनाउन चाहन्छौ । त्यसैले भोली त्यसतर्फ लाग्दैछौ । म्याग्दीको डाँडाहरुमा खच्चडमा पुस्तकहरु बोकेर पुग्नुको रमाइलो र आत्मसन्तुष्टी शब्दमा ब्यक्त गर्न गार्हो छ मलाई । कहिलेकाँही शब्दहरु अपुरा भैदिन्छन ठ्याक्कै भावना ब्यक्त गर्न । त्यस्तै परिबन्दमा म छु ।

नयाँ बर्षसँगै नयाँ उत्साह थपिओस ।

बर्ष २०१० ले तपाईंहरुको जिवनमा सकारात्मक परिवर्तन ल्याओस । यही मेरो कामना तपाँइहरुका लागि ।

थप अपडेट पछि ।

Posted चिन्तन-मनन |